KHAWTHLIR

Governor kâwm
Governor Lt.Gen. Nirbhay Sharma leh Mizoram Ex-Services League hruaitute chu nimin khan Raj Bhavan-ah an inkâwm. Lt.Gen. Nirbhay Sharma chuan, sipai bángte chu anmahni hamṭhatna awlsam taka an hriat zung zung theih nan ram dang nen inbiak pawhna ṭha zawk leh computerised network nei turin a chah.

Zirtirtu dah phût
MZP Dampui Branch chuan thuchhuah siamin, Mizoram sorkarin Dampui Middle School-a zirtirtu pakhat June 1, 2015-a a sawn chhuak chu pawi an tih thu an tarlang a; June 12, 2015 ral hma ngeia a aiawhtu tur regular teacher(SSA teacher ni lo), Dampuia awm nghet thei tur dah turin sorkar an phût. An phut anga zirtirtu dah a nih loh chuan June 16 aṭangin Dampuia zirna-in zawng zawng khâr an tum thu an tarlang bawk.

Thisen pe
Thingsul Tlangnuam Branch YMA chuan YMA Day thleng tur pualin nimin khan Aizawl Civil Hospital tan thisen unit 33 an pe a, a petute mipa 31 leh hmeichhia pahnih an ni.

NAFSCOB-ah Mizo
India rama cooperative bank hrang hrangte inthlunkhawmna, National Federation of State Cooperative Bank (NAFSCOB) chuan nimin khan Mumbai-ah General Body Meeting an nei a; kum nga chhunga Board of Directors tur an thlan zingah Mizoram Cooperative Apex Bank chairman T Lalmuanpuii a tel.

Bru buaipui duh lo
MPC party office bearer-te nimina an party pisaa ṭhukhawm chuan resolution an siam a; Mizorama Bru rawn kîr duh lo chu an duhnaah awm mai se, sorkarin buaipui tawh lo se an duh thu an tarlang.MPC chuan, Mizoram aṭanga anmahni duh thu ngeia Tripura-a chhuk Bru-te lak let tumin sorkarin theihtawp a chhuah chungin Bru-te hian lo kîr leh an duh lo a, in report duh an awm loh avangin buaipui tawh loh an duh a ni.