Mizoramah Maggi la khap rih lo

Tun hnaia India ram hmun hrang hranga an khap mek, Maggi Noodles chu Mizoram sor­kar pawhin nimin khan khapna tuhpek chhuah tum mah se, sorkar laipui aṭanga thupek hmuh loh vangin khapna thupek an chhuah ta rih lo.

Health principal director leh Food Safety commissioner ni bawk Dr K Ropari chuan, sorkar laipui aṭanga thu an la hmuh loh avangin Mizorama Maggi Noodles zawrh leh hralh khapna thupek an la tichhuak lo niin a sawi a; Maggi siam­tu Nestle company-in state tina Maggi Noodles distributor-te hnena Maggi Noodles an lak tawhte thawn kîr tura a hriattir erawh chu distributor-te'n an bawhzui dan ngun takin an enfiah dawn tih a sawi.

Thu dawn danin, Aizawla Maggi Noodles distributor-te chuan an hnen aṭanga Maggi lei tawhte chu thleng an phal a, mahse a thlengtute chu pawisaa kîr loin, bung­raw dangin an thlengtir a ni. Nestle company siam tho, Maggi Noodles ni lo, Maggi dangte chu company-in la kîr turin a hriattir lo thung.