AMC-ah Congress an artelukàwn thei : Duhoma

ZNP president Lal­duhoma chuan, kum tawp lama Aizawl Municipal Council (AMC) in­thlan awm turah Congress party chu artelukàwn thei dinhmunah an ding niin a sawi a, "Chuvang chuan tualṭo party-te inngeih lohtir tumin hèm thlak an tum mek a ni,” a ti.

Nimina ZNP pisaa inkhawmah thu sawiin, Lalduhoma chuan, “Ram tana inlungrual a ṭul hunah chuan tun hmaa thawkho ngai lo pawh thawhho a ṭul cháng a awm a, mal din a ngaih hunah pawh kan mal din mai ṭhin. Tun hma thil sawi sawi a ṭul loh cháng pawh a awm ṭhin," a ti a; AMC in­thlan awm turah tute party fuihpawrh leh hèm thlak vang maia buai rual an nih loh thu a sawi.

ZNP chuan ertu leh sawichhetu a nei tam hle nia sawiin, Lalduhoma chuan thil lawmawm lam a nih thu a sawi a, "MLA nei zo lo mah ila vote sing ruk aṭangin vote nuai khat chuangah kan inhlangkai a, VC leh LC inthlanah ZNP hi party hmasawn awm chhun kan ni,” a ti.

ZNP President chuan, Mizorama Thlarau Thiang­hlim harhna thleng mekah kohhran leh harhna hmusit zawnga ram hruaitute’n ṭawngkam an nei ṭhin chu ṭha lo a tih thu sawiin, chíng tawh lo se a duh thu a sawi a; ram hruaitute chu harhnaa inhnim phúm ve zawk turin a ngen a ni.