MSU-in RUSA-a thil tih dan an dem

Mizo Students' Union (MSU) chuan thuchhuah siamin, Rashtriya Uchchatar Shiksha Abhiyan (RUSA) hnuaiah dan lo leh advertisement chhuah loa thawktu lak a awm niin an tarlang.

MSU chuan, RUSA chu sorkar laipuiin state hrang hranga zirna in sang zawkte harsatna leh buaina sutkian a nih theih nan te, college building leh library tihchangtlun nan te, zirtirtu mamawh zual college-te phuhrukna tura a din a nih thu an sawi a; chutih lai chuan Mizoram RUSA hnuaia inrêlbàwl ṭan dan chu ṭha tâwk lo hlea an ngaih thu an sawi.

MSU chuan, RUSA hnuaia thawk tur mi 23 lak dan leh RUSA sum hman dan ṭhenkhat chu dik lo hlea an ngaih thu an puang a; sorkar hna thla thum chin thawk tur lak dawnin advertisement chhuah ngei a ngaih bakah, Employment Exchange kaltlanga lak tur a nih laiin, inhrilhhriatna awm loin thawktu mi 23 an la niin an sawi a ni.