Kaskau-a Bru-te lak let tumna titawp

Nimin khan Tripura-a Kaskau Bru relief camp-a Mizoram Bru-te lak kîr ṭan hun a ni a, mahse Mizorama kîr duh an awm loh avangin lak kîr an ni lo a, Kaskau camp bika Bru lak lêt tumna pawh chawlhsan a ni dawn.

Home department aṭanga thu dawn danin, Bru lak let dan tur ruahmanna siam ang chuan, Kaskau camp-a mite chu an awmna camp-ah June 2-4, 2015 chhunga enfiah tur an ni a, enfiah tumnaah Mizorama kîr duha inlan an awm loh avangin, June 8-12 chhunga lak let tum pawh tih theih a ni lo.

Hetih lai hian, ruahmanna awm sa angin camp dang pangaa mite chu enfiah leh lak let tum leh a ni dawn a; Khakchangpara camp-a awmte chu June 15-18 chhungin enfiah an ni ang a, June 22-26 chhungin lak kîr tum an ni ang.

Khakchangpara zawhah Hamsapara, Ashapara, Naisingpara leh Hazacherra camp-a awmte enfiaha lak let tum leh a ni ang a; Bru lak let hna chu September 4, 2015-ah zawhfel tura ruahman a ni.