Lui humhalh ṭha lawmpuina hlan

Fisheries department chuan nimin khan an directorate-ah Aizawl district chhung luia sangha humhalh ṭha tlawmngai pawl panga hnenah lawmpuina Rs. 40,000 ṭheuh an hlan.

Lawmpuina hlan inkhawm hi Fisheries director BD Tyagi-in a kaihruai a; Ṭhiak Branch YMA leh Samlukhai Branch YMA, Tlawng Dung Humhalh Joint Committee, Keifang Fisherman Association, Joint YMA Saitual leh Joint YMA Khawruhlian-te hnenah lawmpuina hi hlan a ni.

Tlawng dung Humhalh Joint Committee-ah hian Aibawk, Sateek leh Bawngthah khaw V/C leh YMA branch-te an thawkho a; anni hian Tlawng lui, Tuizochhuah aṭanga Tuithau chhuah thlengin an humhalh a ni.

Ṭhiak Branch YMA leh Samlukhai Branch YMA ṭangkawp chuan Chângte lui hnár leh he luiin Tlawng lui a finna thleng an humhalh.

Keifang Fisherman Association chuan Tuivawl lui dunga sangha chu lên hmang chiaha man turin hma an la a, Tuivawl leh a chhehvel luiteah dynamo, chinai, bomb leh thil dang hmanga sangha man an khap.

Saitual Joint YMA chuan Saitual tlak lama awm Thingnghing lui dungin Tuirini a finna thleng vengin, he lui dunga sangha leh nungchate an humhalh a ni.

Khawruhlian Joint YMA chuan Khawruhlian leh a chhehvela awm lui lian deuh deuh - Tuirial, Tuirini leh Tuiphu luite an humhalh a ni.