Rooftop solar-ah central-in a tum bâk Mizoram sorkarin a tum belh dawn

Power & Electricity minister F Rodingliana chuan nimin khan a pisaah thuthar thehdarhtute a kâwm a; rooftop solar-ah central sorkarin a subsidise bakah, state sorkarin a subsidise belh dawn tih sawiin, Mizo mipuiin chhawr ṭangkai ngei se a duh thu a sawi.

F Rodingliana chuan rooftop solar chu ZPM auhla pakhat a nih thu sawiin, "State dangah chuan central sorkarin a subsidise bak subsidise a awm lo. Mizoramah chuan solar rooftop hi kan ngai pawimawh a, mipuiin an chhawr ṭangkai theih nan state sorkar sumin kan subsidise belh dawn a, hemi atan hian cheng vbc. 4 vel ruahman a ni," a ti.

Rooftop solar chu man tlâwm taka neih theih a nih dawn tak avangin Mizo mipuiin chhawr ṭangkai ngei se a duh thu sawiin Minister chuan, "Power indaih lohna tihrehna atan leh phai aṭanga power kan lak luh tih­tlem­na atan mipuiin tih theih kan nei a ni," a ti a, mipuite'n ngaihven se a duh thu a sawi.

PE Minister sawi danin, state dang tan chuan central sorkarin rooftop solar atana subsidise a pek hian bituk chin a nei a, Mizoram tan erawh Union Minister a dil angin bituk chin a awm lo. A duh apiang tan subsidise rate-in rooftop solar bun theih a ni. Rooftop solar bun tur hian PE department chuan pawmpui bik vendor 11 a nei.

Empanelled vendor-te chu - Thlado Green Tech, MM Enterprises, Enervoir Power System Pvt. Ltd., Agri Green Power Ltd., LT Skylite, Thangruma Projects, Kim Kim Electricals, Royal Floria, VL Traders, Swastik Enterprises leh Samuel Enterprises-te an ni a; rooftop solar duhte an pui thei reng a ni.

PE minister F Rodingliana chuan, electric smart meter pawh hman thuai a nih dawn thu sawiin, "Smart meter hman hian kan electric bill a tam phah dawn lo a, kan duh zat ang kan top-up thei dawn. Kan hman zawh apiangin top-up theih zel a ni dawn a, kan top-up kha a thla chhungin kan hmang zo lo a nih chuan a thla lehah rin zui theih a ni ang," a ti.

F Rodingliana chuan, smart meter buaipuitu turte nen inremna an ziah tawh thu sawiin, "Bul ṭan theih reng ni mah se, power supply a khaihlak zeuh zeuh a ngaih dawn avangin kum thar lamah ṭan kan tum," a ti a, smart meter hman ṭan a ni dawn ta chu department pawh an lawm thu a sawi.

Zawhna chhangin Minister chuan, "Cooperation-a PE department leh tumna hi kan chawlhsan lo a, zawi muangin kan buaipui chho a, thawk­lehkhata leh burh chi a ni lo," a ti.

PE Minister chuan, load shedding a awm loh nan theihtawp an chhuah thu sawiin, "Kan khâwl leh hruite a hlui deuh tawh bakah, power mamawh a tam zel avangin a zo tawh lo. Chumi thlak hna chu ngawrh taka thawh mek a ni a, load shedding a awm phah ṭhin," a ti a; RDSS-ah khawl leh hrui tihchangtlunna atan sum an dil belh mek thu sawi bawk.