Sihhmui kài Tlawng lei dawh a khawmuang leh rih dawn

Aizawl-Lengpui Airport kawng, Tlawng Sihhmui kàia lei dawh mekah, lei dawh kâi tura load test a nih laiin lei khai kângtu hrui pakhat a chat a; hei vang hian lei dawh hna a khawmuan phah dawn a, Aizawl lam aṭanga Mamit district lama kal tur lirthei lian (MMV leh HMV) bik tan Buichali lamah kal rih a la ngai dawn.

Tlawng Sihhmui kaia lei dawh mekah harsatna a awm avang hian PWD chuan mipui tana hriat tur a tichhuak a; lei khaina hrui a chah avang hian lei dawh kai hna chu chhunzawm mai theih a ni dawn lo tih an tarlang.

PWD tarlan danin, Tlawng lui chunga dawh kài tur lei chu Sihhmui-Mamit district kawngpui pangngaiah hnuh phei a ni tawh. Kawngpui pangngaia lei innghat tawh hêlna kawngah lirthei tê (LMV chin) chu kaltlang theih a ni a; lirthei kal dan a buai loh nan lirthei lian, MMV leh a aia liante chu Buichali lam kawnga kal tura tih a ni thung.

PWD chuan, Sihhmui kaiah lirthei kal vel a fel zawk theih nan lei lehlam lehlamah PWD mi leh sate an awm dawn tih sawiin, an thu ngaichâng turin mipui an ngen a, "Harsatna hrang hrang avangin kawng hmangtu mipui hriatthiamna kan ngen e," an ti.

Lei dawh kai chhin (load test)-ah harsatna a awm avang hian lei dawhtu contractor-te leh an design engineer-te'n tih dan tur an ruahman thar leh a ngai dawn a, thutlukna siam a nih veleh lei dawh kai hna chhunzawm tur a nih thu PWD chuan an tarlang bawk.