Tuialhtheia chhiah thar lak aṭangin thla 2-ah cheng nuai 442.98 hmu
Mizoram sorkarin September 1, 2024 aṭanga tuialhthei man a tihsan hnuah thla hnih chhungin Social Infrastructure & Service Cess leh, Road Maintenance Cess aṭangin cheng nuai 442.98 hmuh a ni. Sorkar kum kal mek 2024-25 ah chhiah hrang hrang kaltlangin cheng nuai 75,724.64 hmuh a ni tawh a, chu'ng zinga 83.56% chu Goods & Service Tax (GST) aṭanga hmuh a ni.
Taxation chhiah hmuh dan (monthly achievement)-in a tarlan danin, Mizoram sorkarin petrol leh diesel-ah Social Infrastructure & Service Cess leh Road Maintenance Cess a lak hnuah November 2024 chhung khan Rs 2,13,25,156 ve ve hmuh a ni a, belhkhawmin Rs 4,26,50,312 a ni.
Tarlan tawh angin, tuialhtheia cess chi hnih lak chungchangah hian Taxation chuan August 30, 2024 khan hriattirna (notification) a tichhuak a; petrol leh diesel-ah hian litre khat zelah Social Infrastructure & Service Cess leh Road Maintenance Cess Rs 2 ve ve (a pahnihah Rs 4) lak a ni.
Taxation monthly achievement tarlan danin, sorkar sum kum kal mek 2024-25-ah thla riat (April-November, 2024) chhungin Taxation-in chhiah Rs 7,57,24,64,459 (nuai 75,724.64) a hmu. October leh November thla bikah ṭum danga la tel ngai lo cess chi hnih lak tel a ni a, cess pahnih aṭanga thla hnih chhunga sum lak luh chu Rs 4,42,98,664 a tling.
April-November 2024 chhunga Taxation chhiah hmuh zingah GST aṭanga hmuh tam berin, Rs 6,32,73,08,324 a ni a, chhiah hmuh zawng zawng aṭangin 83.56% a ni. GST dawttu Sales Tax aṭangin Rs 1,09,74,90,565 (14.49%) hmuh a ni bawk.
October 17, 2024 khan chief minister Lalduhoma chuan a pisaa thuthar thehdarhtute a kawmnaah, tuialhthei aṭanga cess an lak zawng zawng chu mipui tan an hman vek dawn thu a sawi.
Chief Minister chuan, Road Maintenance Cess chu kawng atan liau liau hman a nih tur thu a sawi a; Social Infrastructure & Services Cess chu zirna leh damdawi lam thil chi hrang hrang tihchangtlunna a tan te, thiamthil tihhmasawnna lama ṭhalaite inzirna hmun tihchangtlunna atan te, women hostel-a thawktu tur lakna atan leh thil dang pawimawhahte hman a nih tur thu a sawi bawk.