December 23-24 leh ni 31-ah Aizawlah No Vehicle Zone

Kumin December 23-24 leh ni 31-ahte Aizawla Canteen kual leh Chanmari kâwn inkarah No Vehicle Zone kalpui leh tum a ni a; hmalak dan tur leh tih tur ṭulte nimin khan chief secretary Khilli Ram Meena kaihhruaiin CS Conference Hall-a sorkar thuneitute'n an sawiho.

Sorkar thuchhuah tarlan danin, No Vehicle Zone hi Krismas leh kum thar vuakvêta Canteen kual leh Chanmari kâwn inkara traffic tâwt lutuk tihziaawmna tur a ni a; December 23-24 leh ni 31-ahte chawhma dar 10 leh tlai dar 4 inkarah kalpui a ni ang.

Aizawla traffic jam-in a nghawng ve lohna hmuna lirthei intlân chhâwkna kalpui dan ennawn dilna chu nimina meeting-ah hian ngaihtuah a ni a; Unified Transport Coordination Committee on Traffic Management-in uluk taka an lo zir chian turin an dah.

Ṭhutkhawmah hian Director General of Police, PWD Secretary, Finance Secretary, Commerce & Industries Secretary, Home department, Land Revenue & Settlement, Information & Public Relations, Law & Judicial, PHE leh Transport department hotute an tel a; UDPA secretary Lalmalsawma Pachuau-in thu ngaihtuah turte a sawi hawng.

Aizawlah hian Krismas dawn hnaia lirthei tlan phal lohna hmun leh hun, No Vehicle Zone hi kum 2009 khan kalpui ṭan a ni.