Zirna-ina hotu inthlahdahte vangin Scho' dawng lo tur zirlai an awm - MSU

Mizo Students' Union (MSU) General Headquarters hruaitute chuan nimin khan an president B Lalkhaw-ngaihzuala hoin Aizawl Press Club-ah thuthar thehdarhtute an kâwm a; zirna-ina thawktute zingah inthlahdah an awm avangin scholarship dawng lo tur zirlai an awm thu an sawi.

MSU President chuan, kum 2023-24 atan Mizorama zirlaite'n scholarship an dawn tur chu first instalment leh second instalment sem zawh a nih tawh thu leh Mizoram Scholarship Board-in third instalment tur an buaipui mek thu a sawi a ni.

B Lalkhawngaihzuala chuan, post matric scholarship la dawng lo zirlai 5,450 leh pre matric scholarship la dawng lo zirlai 1,155 an awm mek thu sawiin, sikul ṭhenkhata scholarship khawihtu nodal officer-te inthlahdah avangin scholarship dil zingah dawng lo tur zirlai an awm thu leh pawi an tih thu a sawi.

MSU President chuan, "Cherhlun HSS (adhoc)-a zirlai scholarship dilte chu an sikulin verification an tihsak loh avangin kumin hian scho' an dawng thei dawn lo a, pawi kan ti a, sikula thawktute kan dem tak zet," a ti a; hrem ngai an awm chuan hrem turin sorkar a ngen.

B Lalkhawngaihzuala chuan Lungrang South High School (adhoc)-a thawktute'n scholarship buaipui an thiam loh chhuanlamin an zirlaite tan scho' an buaipui thei lo niin a sawi a, "Zirlaite tana intuaithar peih tawh lo leh ngaihsak peih tawh lo zirtirtu an awm hi pawi kan ti a, zirlaite'n an hamṭhatna an hmuh theih nana hma min laksak turin Mizoram sorkar kan ngen a ni," a ti.

MSU President hian scholarship dil duh, an zirna-ina thawktute'n an buaipui peih si loh hriate chu MSU hruaitute hnenah hriattir turin a chah a ni.
B Lalkhawngaihzuala chuan, "Pawl 9 leh pawl 10 zirlaite'n pre matric scholarship an dil thei a, pawl 10 chung lam zirlaite'n post matric scholarship an dil thei. Zirlai zawng zawng scholarship dil vek turin kan inhriattir a, dil dan thiam lote tan MSU Pisapuiah scholarship help desk kan buatsaih," a ti.