AMC-a thawktu tur lakna MZP-in tun kar chhung ngeia sût an phût

MZP chuan, tun hnaia Aizawl Municipal Corporation (AMC)-a hna lakah thil felhlel, mimal induhsakna uchuak a awm ngeiin an hria a, thawktu lakna chu tun kar chhung ngeia sût tur leh dik taka thawktu la turin AMC hotute an phût.

AMC-in thawktu a lâk dan chungchangah MZP chuan nimin khan extended OB meeting an nei a; thuchhuah an siam nghal. AMC-a hna hrang hrang, hlawh ṭha tak takte chu a duh apiangte tana dil theih turin advertisement chhuah a ni lo tih sawiin MZP chuan, "Kan chhui zelnaah, sorkar phalna pawh an la lo nia hriat a ni," an ti.

MZP chuan AMC-a tun hnaia thawktu lakna chu tun kar chhung ngeia sût turin AMC hotute an phût a; an ngennain awmzia a neih loh chuan hna zawng mekte thlavâng hauh turin theih ang anga hma an lak dawn thu an tarlang.

AMC hotute'n advertisement chhuah loin an mi duhsak zawng an la ngei nia a lan thu sawiin MZP chuan, "Ṭhalai lehkha thiam hna zawng mek tam tak awm karah hetianga duhsak zawngte hnaa thun thâwm hriat tur awm fo hi pawi kan ti tak zet a, kan dodal tlat a ni," an ti.

MZP tarlan danin, September 11, 2024-a AMC Executive Council Meeting chuan hna hrang hrangah thawktu fixed pay leh contract basis-a lak an rêl. AMC Meeting hian public relations officer pakhat, project assistant pahnih leh assistant account officer pakhat fixed pay-a lak turin an rel a, lak tawh a ni. Contract basis-in consultant geologist panga, urban animal husbandry & veterinary officer pakhat leh junior engineer pakhat lak an rêl bawk.

MZP chuan, March 12, 2024 khan AMC hnuaia geologist pathum, urban animal husbandry & veterinary officer, junior engineer leh assistant account officer pakhat ṭheuh lak danah pawh dan kalha thil tih a awm ngeia an hriat avangin an dodal tawh tih an sawi a, "MZP ngenna angin AMC Executive Council meeting March 15, 2024-a ṭhukhawm chuan hna lak hrang hrangte a sût (revoke) a, March 18-ah sûtna lehkha tihchhuah a ni. Hna lakna sût tawh hi tun hnaiah tharthawh leh niin, a mi ngai ṭhenkhatte thun nawn leh ngat an ni hian tu emaw duhsak zawngte hnaa thun theihna tura ruahman a tirin­hlelhawm hle a ni," an ti.