KHAWTHLIR

Black Day hmang

MZP chuan nimin chawhnu khan an pisa kawtah Black Day an hmang. Black Day hi Citizenship Amendment Bill pawm a nih duh loh lantirna a ni a, North East Students' Organisation (NESO) hmalakna niin, state dangahte pawh hman a ni. CAB hi dodal­na karah December 11, 2019 khan pawm a ni a; Parliament-a pawm ni, December 11 chu NESO chuan Black Day-ah a puang a ni.

Ṭanpuina hlan

BCM Shalom Kohhran, Mission Vengthlang chuan Manipur-a Zo hnahthlak harsatna tâwkte ṭanpuina atan nimin khan Central YMA hnenah Rs 1,00,000 an hlan. Ṭanpuina sum hi BCM Shalom Kohhran hruaitute'n CYMA general secretary Prof. Malsawmliana hnenah an hlan a ni.

AAP-te'n NIT hotu an kâwm

Aam Aadmi Party, Mizoram hruaitute chuan nimin khan National Institute of Technology (NIT), Mizoram director Prof. S Sundar an kawm a, tun hnaia faculty an lak thar turah ram leilung fate hamṭhatna tur ngai pawimawh tur leh induhsak bikna awm lo se an duh thu an thlen. AAP chuan, NIT Mizoram chu Mizoram sorkarin ngaihsak se, campus ṭha an neih vat theih nan harsatna chingfel tura an duh thu an sawi bawk.

Hri danna inzirtir

AH&Vety department chuan nimin khan Hnahthial district-a New Ngharchhip leh Bualpui-H khuaah ran hri danna lâk pawimawhzia inzir­tirna, Awareness on Vaccination an buatsaih. Veterinary officer Dr K Zothanpuii'n ran hri - swine fever, foot & mouth disease, anti-rabies, brucellosis, ar pûl hri leh hri dangte laka invenna lak a pawimawhna leh hri lêng vênna atana pawimawhte a zirtir a ni.

CCTV vuah turin ti

Serchhip District Magistrate chuan Bharatiya Nagarik Suraksha Sanhita Section 152 tlawh­chhanin thupek a chhuah a, Serchhip district-a schedule H leh schedule X damdawi zawrhna dawrte chu CCTV vuah vek turin a hriattir. Thupek zâwm lote chu BNS 2023 hmang­a hrem theih an ni.

Dilna 39 pawm

Serchhip Town Land Committee chu nimin khan an chairman Paul L Khuma, bawrhsap hoin DC meeting hall-ah an ṭhu a; kohhran leh mimal rama Land Committee recommendation dilnate an ngaih­tuah. Dilna hi 44 ngaihtuahin, 39 an pawm a, panga chu an hnâwl. Dilna 44-te chu mimal house pass dilna 38, kohhran pahnih land lease dilna pathum, sorkar department leh VC pakhat ve ve aṭanga land lease dilnate a ni.