CM-in Saitual leh Khawzawlah Excise & Narcotics Station a hawng
Chief minister Lalduhoma chuan nimin khan Saitual leh Khawzawlah Excise & Narcotics Station a hawng. CM chuan, sorkar hnathawkte chu sorkar rawih an nih angin ṭangkai taka thawk chhuak tur an nih thu a sawi.
Saituala END pisa hawnnaah Lalduhoma chuan, ruihhlo donaa hmun pawimawh ni turin Saitual district-ah Excise & Narcotics station hawn a nih thu a sawi a, "Sorkar chuan ruihhlo do leh tihrêm hi a ngai pawimawh tak zet. Ruihhlo donaa thawk turte pawh lak belh a nih theih nan sorkarin theihtawp a chhuah a, sorkar hnathawkte chu sorkar rawih an nih angin ṭangkai taka thawk chhuak tur an ni," a ti.
END hnuaia thawktute chu ruihhlo laka fihlim tura chahin Chief Minister chuan, ṭhahnemngai taka thawk tur leh khawtlang leh kohhran hruaitute nen thawhhona ṭha nei turin a chah.
Excise & Narcotics minister Lalnghinglova Hmar pawhin thu sawiin, Saitualah END-in hmun an nei ve ta chu a lawm thu a sawi a, "Sorkarin ruihhlo hluar mek a ngaimawh a, END hnuaia thawk turte la tharin, lirthei 18 pawh pek kan ni tawh. Saitual hi ruihhlo tlemna ber district ni turin kohhran leh khawtlang hruaitute leh sorkar department hotute ṭha taka END thawhpui a, ṭangrual taka hma la turin ka sâwm a ni," a ti.
Excise & Narcotics station hi district thar pathum - Saitual, Khawzawl leh Hnahthialah hawn a ni dawn a; thawktu mi paruk ṭheuha bul ṭan tur a ni.
Station hawnnate hi END secretary Lalramsanga Sailo-in a kaihruai a, END commissioner Z Lalhmangaiha leh district bawrh-sapte pawhin thu an sawi a ni.