Aizawl district-ah kum chanve chhungin CD ratio 40% aia hniam bank 9 a awm

Aizawl district bawrhsap Lalhriatpuia hoin nimin khan DC conference hall-ah Special District Consultative Committee (DCC), District Level Review Committee (DLRC) leh District Level Security Committee (DLSC) an ṭhu. Kum chanve, April-September, 2024 chhungin Aizawl district-a bank pakua chu an CD ratio 40% aia tlem a ni tih tarlan a ni.

Ṭhutkhawmah hian sorkar sum kum (financial year) kal meka first quarter (April-June) leh second quarter (July-September) chhunga Aizawl district-a bank-te leh an credit deposit (CD) ration dinhmun thlirho a ni.

Sorkar thuchhuah tarlan danin, April-September, 2024 chhungin Aizawl district-a bank hrang hrangte CD ratio 0.73%-in a pung a; mahse, bank pakua chuan CD ratio 40% aia tlem an nei a, bank 15-in 40% chung lam an nei. Bank zingah India Bank-in CD ratio 462.00% neiin a sang ber a, CD ratio hniam ber chu AXIS Bank niin, 11.02% chauh a ni.

April-September, 2024 chhung hian Kisan Credit Card (KCC) hnuaiah mi 2,264 hnenah loan cheng nuai 5,331.05 pek a ni a; sorkar scheme dang - RLM, NULM, PMEGP leh Stand Up India hnuaia loan pek chhuah te, PMMY leh PMJDY hnuaia hmalakna te, social security scheme PMJJBY, PMSBY hnuaia hmalaknate thlirho a ni bawk.

Bawrhsap Lalhriatpuia chuan, banker kal khawmte chu mipuiin an bank-ah pawisa dah (deposit) se an duh ang bawkin, mipui hnenah loan pek chhuah hreh lo turin a chah a, CD ratio 40% aia hniam nei bank-te chu ṭan la zual turin a chah.

Lalhriatpuia chuan, "CD ratio 60% aia hniam nei lo turin ṭan la ang che u. Mipui tana hamṭhatna tur thilah chuan local condition hrethiam u la, dan bawhchhe si loin a ṭulnaah chuan dan pawt fân thiam ve turin ka ngen che u a ni," a ti.