Garage-a toilet siam MNYF-in an duh lo

MNYF chuan thuchhuah siamin, Legislator's Home, Tuikhuahtlanga Rajya Sabha MP K Vanlalvena lirthei dahna (garage)-ah inthiarna (toilet) siam tum chu Rajya Sabha MP zahawmna tihbawrhbânnaa an ngaih thu an tarlang.

Legislator's Home-a Rajya Sabha MP-in lirthei a dahna ṭhina inthiarna siam tuma leirawhchan rem tawhte chu nimin khan MNF ṭhalaite'n an tichhia nia thu dawn a ni.

MNF ṭhalaite chuan, legislator-te chenna quarters-a MP K Vanlalvena lirthei dahnaah ZPM contractor pakhatin thuneitu sang zawk aṭanga thu hmu anga insawiin toilet sak tumin hna an thawk niin an tarlang a, "MP-te hi VIP an ni a, an chenna aṭanga chhuak tur leh khawih danglam tur a nih chuan official-in hriattir ṭhin an ni. Hrilh lâwkna awm loa hna an thawk mai hi mak kan tiin kan dem tak zet a ni," an ti.

Legislator's Home-ah hian electric kal sual vangin chimney a chhe nia sawiin MNYF chuan, "Rajya Sabha MP tih loh quarters dang luahtu zawng zawng a thar an pe vek a, Pu Vena chiah an pe ve lo," an ti a; ZPM sorkar chu tenawm tak zeta an ngaih thu an tarlang.