Kan tihhlawhtlin theih ngei ngei loh tur manifesto kan siam ngai lo - MPCC Treasurer

Aizawl District Congress Committee (ADCC) chuan nimin khan Congress Bhavan-ah Media Training an nei a; hmanpuitu MPCC treasurer Dr Lalmalsawma Nghaka chuan, Congress party-in manifesto an siamin, an tihhlawhtlin theih ngei loh tur chu an siam ngai lo niin a sawi.

Dr Lalmalsawma Nghaka chuan, road map uluk taka duangin hma an la ṭhin nia sawiin, “Congress party hian manifesto kan siam rêng rêng hian kan tihhlawhtlin theih ngei ngei loh tur kan siam ngai lo. Kan manifesto-a kan dahte hi zir chian sa a ni zel a, AICC-a mithiamte leh Mizoram leh India ram hmun hrang hranga mithiamte râwnin, road map uluk taka duang lâwkin hma kan la ṭhin," a ti.

MPCC Treasurer chuan ZPM leh MNF chu an tihhlawhtlin theih loh tur zuarah a puh a, "ZPM leh MNF-te'n zir chian tak takna awm loa mipui hnenah an tihhlawhtlin theih miah loh tur mumang an zawrh ṭhin ang hi kan ram mipui tan a him lo," tiin, ZPM leh MNF party-te'n an zawrhte chu beidawnna thlentu niin a sawi.

Dr Lalmalsawma chuan, health care chungchang Congress sorkar ṭhatzia a lang niin a sawi a; MNF sorkarah health care bill a kum têl mipui an batsak a, ZPM sorkarah thla ruk hnuah October 2024 - March 2025 atan chhungkaw khat tan Rs 1,00,000 an rawn ti thei hram chauh niin a sawi thung.

MPCC general secretary Dr Lallianchhunga pawhin thu sawiin, Congress party-in nasa takin hma an sawn niin a sawi a, "Kum 2028-ah sorkarna siam ngei turin hma kan la," a ti a; RTI Act hmang ṭangkai turin ADCC hruaitute a chah bawk.