Mamitah raltlan tan buhfai sem

Mizoram sorkara Home department-in râltlânte tana buhfai a ruahman chu Mamit district-ah December 10, Thawhlehni aṭang khan sem a ni.

Buhfai hi mamit DC Office aṭangin DMR district organiser Lalrinchhana leh Village Committee on Myanmar Refugees/IDPs-te'n buaipuiin an sem. Raltlan awm tamna leh camp awmna Dâpchhuah leh Nghalchâwm khuaa mite tan sem hmasa a ni a; December 10 khan Dâpchhuah khuaah sem niin, nimin khan Nghalchâwma Myanmar raltlante hnenah sem leh a ni.

Mamit district-a raltlante tana buhfai sem tur hi ip 373 (quintal 184.04) a ni a, mi pakhat tan kg. 31.5 zel pek tura ruahman a ni. Mamit district-a khaw hrang hranga Myanmar leh Manipur aṭanga sahimna zawnga raltlan an awm a, an tana sorkarin buhfai a pek hi kumin 2024 chhungin sem zawh hman tum a ni.