Kum 2015-16 plan fund tur Ruahman theih a la ni lo

Planning Commission thlaktu NITI Aayog chuan plan fund ruahman dan tur Mizoram sorkar a la hriattir lo a, hei vang hian Mizoram State Planning Board chuan kum 2015-16 atana Mizoram plan fund tur ruahmanna mumal an la nei lo.

Planning Board hian ṭum dangah chuan plan fund tur ruahmanna siam­in, chief minister hoin Planning Commission hotute nen plan discussion neih a nih hnuah siam rem ngaite siam rem a ni ṭhin a; plan discussion-a thutlukna chu Planning Commission-in Finance Ministry-ah an thehlut ṭhin a ni.

Sorkar kum kal mek­ah chuan Planning Commission ṭhiah a nih avangin Planning Board-in sorkar kum hmasaa Mizoram sorkar sum hmuh dante sorkar laipuiah an thehlut a; chu chu sawihona pawh awm loin Finance Ministry-ah thehluh a ni.

Vanglaini palai zawhna chhangin Planning Board hotute chuan, "Nikum lama kan sum hmuh ang tal hi chu kan mamawh thu sorkar laipui hotute hnenah kan thlen a; NITI Aayog lamin plan fund rua­hman dan turah engmah instruction min la pe lo a, an thu kan ngai­châng deuh tawp mai a ni," an ti.

Plan fund-a rìn luh tâk centrally sponsored scheme (CSS), Non Lapsable Central Pool of Resources (NLCPR) leh North Eastern Council (NEC)-ah pawh sorkar laipuiin ruahmanna mumal a la siam lo.

Project hrang hranga state leh sorkar laipuiin sum a intum sem dan tur­ah pawh ruahmanna mumal tak siam a la ni lo a; department ṭhenkhat chu 50:50 tura ruahmanna siam tura thurâwn pek an nia thu dawn a ni.