Retheite ngai pawimawh turin MNF LC-te chah

MNF party chuan nimin khan Mizo Hnam Runah Aizawla local council inthlana MNF ticket-a tlingte lawmna hun an hmang a; thu sawi­tu, MNF senior vice president Tawnluia chuan, MNF LC member-te chu an veng ṭheuha mi rethei leh chanhaite zawng chhuaka ngai pawimawh hmasa turin a chah.

MNF Senior Vice President chuan, Aizawl veng hrang hrangah MNF leh an thawhpuite’n hnehna an chang chu lawmawm a tih thu sawiin, "Ruling party an vanglai taka kan hneh thei hi a tê lo hle a ni," a ti a; Congress party dinhmun chu duhawm lo hle nia sawiin, zahna tham a tlin thu a sawi.

MNF LC member-te chu khawtlang an enkawlnaah langtlang taka thil ti tura chahin, Tawnluia chuan, “In thil tih a chhia a ṭha langtlang takin in pholang ngam tur a ni. Opposition-a ṭhute pawhin mahni veng ṭheuhah langtlang sorkar a awm theihna turin theih­tawp chhuah ang che u,” a ti a; mipui­in an rawngbawl turin hnathawh kawr an hâktir a ni tih hria a, hna thawh kawr ṭet khawpa hna thawk turin a fuih.

Tawnluia sawi danin, LC inthlan zawh takah AMC Ward ang záwnga chhûtin, Ward 19 zinga Ward pakuaah MNF an chak a, Congress party chu Ward parukah an chak a, chak bik awm lohna Ward pali a awm a ni.

MNF Senior Vice President chuan, Congress sorkar chu dan leh thupek kenkawh kawng­ah a hlawhchham nia sawiin, "Kum 2012 V/C inthlanah hmar lam area khaw 15-ah inthlanna an buatsaih thei lo a, kuminah phei chuan V/C 31-ah inthlan theih loh a ni hi dan leh thupekah an hlawhchham lailet dêr tih nemnghettu a ni," a ti. Sorkar chu mahni khua lei tuite venghim thei lo-ah puhin, V/C thlan theih lohna khaw 31-ah a rang thei ang bera inthlan buatsaih turin a phût.

MNF ticket-a LC member atana thlan tlinte chu chawimawina certificate an hlan. MNF thu­chhuah chuan, Aizawla LC 83-ah hian member 528 (general seat 387 leh women reservation seat 141) a awm a; MNF-in general seat 196 leh women reservation seat seat 54 an la a ni.