Health dept-in Maggi vanga Chî-âi lo turin mipuite a chah

Health director leh Food Safety commissioner Dr K Ropari chuan thuchhuah siamin, Nestle company-in a siam Maggi noodles leh a kaihhnawih thila Mizoram mipui hriat turte a puang a; mipuite chu chîâi lo turin a chah.

Health department thu­chhuah tarlan danin, tunlai hian India ram pumah Nestle siam Maggi noodles-in sawi a hlawh hle a; thil pawi leh hlauhawm tak ni thar thutah ngaiin mi tam tak an chîâi niin a lang a; mahse tun dinhmunah chîâina tur a awm lo a ni.

Health department thuchhuah
India ram chhunga ei leh in hriselna (food safety) lama thuneitu sang ber Food Safety and Standards Authority of India (FSSAI) chuan, state ṭhenkhata Maggi Noodles test result avangin India rama state zawng zawngte chu an state chhung ṭheuha Maggi-te chu food testing laboratory-ah test tur leh a result pawh Central-a thawn nghal vek turin May 25, 2015 khan hriattirna a tichhuak. June 4, 2015 khan state tin Commissioner of Food Safety-te chu New Delhi-ah meeting a neih pui a, meeting chuan state tin aṭanga Maggi test result dawn kim a nih hunah Maggi chungchanga thutlukna ram puma zawm tur siam ni se, tiin a rel a ni.
Mizoram pawhin Maggi kan test theih nan Assam Public Health Laboratory a dawr mek a, tun aṭanga rei lo têah Maggi-te test turin kan thawn thei dawn a, Maggi chauh ni lo, ei tur chi hrang hrang he laboratory-ah hian test zui zel tura ruahmanna siam a ni. He mi chhung, result hriat hma chuan mi tinte fimkhur turin kan inhriattir a ni.
Tun dinhmunah FSSAI chuan fimkhur thuah Nestle company chu an Maggi siam mekte titawp a, hralh chhuah tawhte pawh la kîr turin order June 5, 2015 khan a pe. Mizoramah pawh Food Safety hnathawkte chuan Maggi lak let dan enfiahpui tura a hriattir angin tunah hian Food Safety officer-te'n Maggi lak let dan (recall process) uluk takin an en zui a ni.