Naupang sâttu damdawi-inah a thi

Zawngin khaw hmei­chhe naupang chema sâttu Liankhansanga s/o Manga, Tahan, Myanmar chu mipui thinrimin kut an thlâk a, Liankhansanga hi nimin zing dar 8 vel khan Saitual damdawi-inah a thi nia thu dawn a ni.

Saitual Venglai Branch YMA hruaitute hnen aṭanga thu dawn danin, Lalrinsangi (12) d/o Lal­ruatmawia, Zawngin chuan June 8, Thawhṭanni tlai dar 3 vel khan in an kawt­ah chawhmeh tur sapthei hnah a mal a; chutih lai chuan Liankhansanga hian chemin a mawngah a vua a, naupang hawi let chu a dàrah chemin a sât nghal mai a ni.

Naupang ṭê thawmah in chhunga awmte an tlan chhuak a, Liankhansanga chu a tlanchhe nghal a, mi dangin an lo man a ni. Liankhansanga chu mipui thinrimin kut an thlak nual a, mahse khawtlang hruaitute'n humin, zanah Saitual damdawi-in an panpui a; nimin zing dar 8 vel khan a thi ta a ni.

Liankhansanga hi a chhungte hriat a la ni lo a, a ruang chu Saitual damdawi-ina mitthi dahnaah dah rih niin, a ruang hlawm thei tur an ngaichang a; vawiin zing dar 8 thlenga a ruang hlawmtu an awm loh chuan Saitual Bazar Veng thlanmualah phûm a ni ang.

Lalrinsangi pawh Saitual damdawi-inah hruai a ni a, a hliam an ṭhui hnuah an chhuahtir leh nia thu dawn a ni.