Kolasib district-a sorkar hnathawhte thlirlet

Kolasib District Vigilance & Monitoring Committee chu nimin khan co-chairman, Ronald Sapa Tlau, Rajya Sabha MP hoin Kolasib-ah an ṭhukhawm a, sorkar laipui scheme hrang hrang an thlirho.

Ronald Sapa Tlau chuan, Kolasib district chu ramri hrûla awm leh Mizoram kawtchhuah a nih avangin an dinhmun a pawimawh tih a sawi a, "District-a thuneitu leh thawktu hi hmasawnna hna thawhna kawnga a fawng chelhtu ber an ni. Mizoram leh mipui tan an thawk a ni tih hre reng ang che u," a ti a; langtlang taka thil ti turin a hrilh bawk.

Kolasib CMO tarlan danin, kum 2014-2015 chhung khan Kolasib district-ah ngawr (TB) vei hmuhchhuah thar mi 79 an awm a, 2014 chhung khan sikserh vangin mi pathum an thi.

Integrated Housing & Slum Development Programme (IHSDP) hnuaiah chhungkaw harsa zual tan chenna in 300, cheng nuai 704.02 senga sak zawh a ni a, inte chu a neitute'n an luah vek tawh. Job card nei mi 17,838 an awm mek a, kum 2014-15 chhung khan MGNREGA hnuaia ni 24 inhlawhna siam niin, chuta tan chuan cheng nuai 1069.42 hman a ni.

PHE department-in National Rural Drinking Water Programme (NRDWP) hnuaiah khaw 23-ah tui lakna tur tihchangtlun hna an thawk a; NLCPR hnuaiah Bilkhawthlir Water Supply Scheme leh Bairabi Water Supply Scheme-te chu zawhfel tawh niin, hawn thuai beisei a ni.

Meeting-ah hian Kolasib district-a MLA pathum - Hmingdailova Khiangte, K Lalrinthanga leh PC Zoram Sangliana te an tel kim a ni.