Sports leh School Education deptt-te'n School Games huaihawtho dan tur an rel

Sports minister Zodintluanga hoin nimin khan Secretariat Conference Hall-ah infiamna chi hrang hranga association-te'n Mizoram pum huapa intihsiakna an huaihawt ṭhin leh School Education department-in kum tina School Games an huaihawt ṭhinte hmun khata huaihawt dan tur an sawiho.

Meeting-a tarlan dan­in, Mizoram State Sports Council (MSSC) hnuaia School Education department-in School Games an huaihawt ṭhin chu sum indaih tâwk lohna vangin duh thálin an kalpui thei lo a; Sports department-te nena hmalakho hian School Games changtlung zawk buatsaih theih phah beisei a nih bakah, sikul naupang zirlai, infiamna lam theihna ṭha tak tak neite tan hmasawnna a thlen an beisei a ni.

Sports & Youth Services department chu sport association hrang hrang hotute ko khawmin, ruahmanna tihhlawhtlin dan turte sawiho turin an ti a; School Education department pawhin School Games Organising Committee koin, lo ngaihtuah se an ti bawk.

Meeting-ah hian Sports secretary Zothankhuma, Education secretary Manisha Saxena, School Education director K Lalthawmmawia, Sports director Zothanmawia, MSSC secretary C Laltlanthanga leh zirtirtu pawl hruaitute an tel a ni.