Aizawlah Summer Sports ṭan a ni

Mizoram pawn hmun hrang hranga lehkha zirte chuan nimin aṭang khan Aizawlah Summer Sports an ṭan a, Zarkawt Recreation Centre-ah MJA president Vanlalrema Vantawl-in a hawng.

MJA President chuan, phai lama zirlaite chu an awmna khawpui ṭheuhah Mizoram tan thil ṭha leh hmasawnna eng emaw tal puak chhuah tum tura chahin, "Phaia kan awm chhan hi result ṭha tak neihna tur a ni tih kan hre reng tur a ni,” a ti.

Vanlalrema Vantawl chuan, zirlaite mawhphurhna chu taima taka lehkha zir a nih thu sawiin, "Kan ṭhenawm state-te central service-ah an luh ruih ruih laiin kan state kan tlahniam zel hi a ngaimawhawm a, zirlaite'n ṭan in lak lehzual a ṭul a ni," a ti a; zirlaite chu mahni inthunun tur te, hnam dang zingah chetzia leh incheinaah fimkhur turtein a chah.

Kumina Summer Sports hi a vawi 15-na a ni a, June 11 thleng neih a ni ang. Delhi, Pune, Kolkata, Bangalore, Jalandhar, Chandigarh, Chennai, Hyderabad, Imphal, Nagpur, Allahabad leh Shillong-a Mizo zirlaite an tel a; basketball, football, inkawibah, spoon race leh inhruipawhte hmangin an inel dawn a ni.