Silchar Truck Driver Association-in Covid-19 vei enkawlte chhuah phûtin Mizorama lût tur lirtheite an dang

STDA chuan September 10, 2020 khan Silchar Mizoram House-a Liason Officer hnenah lehkha thawnin, an lungawi lohna hrang hrang an tarlang a, an lehkha chu Mizoram Health Minister, Kolasib DC, Cachar DC leh Cachar SP an thawn tel bawk. An lungawi lohna ber chu, an member-te Mizorama Covid Care Centre (CCC)-a enkawl danah leh an awm rei vang a ni.

STDA-in Mizoram House Liason Officer hnena lehkha an thehluha an tarlan danin, Mizoram CCC-a awmte'n ei tur an dawng ṭha lo a, tharum hmanga beih an ni. An member-te chu hun rei tak chhung CCC-a an awm hnuah pawh chhuahtir dan tur district administration-in an ngaihtuah lo a ni. CCC-a rei tak an awm avangin sum leh paiah an chhungte'n harsatna an tawh phah.

An lehkhaah chuan, an member, Mizoram CCC-a enkawl mekte chhuah an nih loh chuan lungawi lohna lantir bak tih tur dang an neih tawh loh thu an tarlang a ni.

Vanglaini palai zawhna chhangin Kolasib DC chuan, an district chhunga quarantine centre-a awm leh CCC-a awmte chu ei tur inang vek pek an nih thu sawiin, "A supply-tu pawh thuhmun an ni. A tirah hnam dang, lirthei enkawltute hi bai pek tel an ni a, an duh loh vangin kan pe chhunzawm lo. An kham loh thu an sawiin kan pek belh a, an lo paih darh mai mai ṭhin," a ti.

Kutthlak nia sawi chungchangah Dr H Lalthlangliana chuan, "Tlân chhuah an tum a, kan police-te'n an chêt khalh hman a, security khauh zawkin kalpui a ni. Hrisel lohna leh insawiselna an nei lêm lo a, an awm rei tawh hlawm si a, an ning lutuk a ni ber," a ti a; an chhuah duhin CCC chhunga bungruate an lo tihchhiat ṭhin thu a sawi.

Kolasib DC chuan, truck driver-te chu Covid-19 an vei lo tih finfiah an nih hma chu Mizoram sorkar duh dan angin, chhuah chi an ni bik lo tih a sawi a, "Mipui himna kan ngaihtuah a ngai. Test hun bitukah kan test ve zel a, a negative-te chu kan chhuah zel a ni," a ti. 

Kolasib DC sawi danin, STDA hruaitute chu an member-te dah an nihna hmun leh enkawl an nih dan endik turin an sáwm ṭhin a, mahse, an enfiah duh lo. Ṭum khat chu rawn kal an tum a, mahse an ṭhulh leh a ni. An duh hun huna rawn kal a, enfiah tura sâwm an ni.

Hetih lai hian, Mizorama lirthei lut tur dangtute chuan Inrinni zan dar 10:30 vel khan Mizo pakhat, tanklorry driver kut an thlak a, a tanker pawh an vawm chhe nual. Lirthei khalhtu chu Lailapur-a tualchhung mi ṭhenkhatte'n an lo chhan a ni.

Kolasib SP Vanlalfaka hmalaknain driver leh lirthei chuan nimin zing dar 5 vel khan Mizoram a rawn thleng a; he thil thleng avangin hian Assam police-te'n thubuai an ziak lut niin an sawi.

STDA-in Mizorama lut tur lirtheite Lailapur-a an dan avang hian Inrinni zan aṭang khan Mizoramah bungraw phur lirthei lut a awm lo a, tank lorry-te erawh chu Assam police vênna hnuaiah an lut thei thung.