Larsapin Saiha leh Lawngtlai a tlawh

Governor Lt.Gen. Nirbhay Sharma chuan nimin khan Saiha leh Lawngtlai a tlawh. Lai leh Mara autonomous district council (ADC) hruai­tute'n an harsatna leh mamawhte an lo thlen.

Lt.Gen. Nirbhay Sharma chuan Saihaa amah lo hmuaktute hmaah thu sawiin, sipaiah kum 40 a ṭan chhungin border area-a chengte leh tlang rama tribal chengte bulah a khawsak nasat thu a sawi a, "In nun a thianghlim a, in nihna ang anga lang ṭhin, hnam rinawm tak in ni. In bula chen nuam ka ti hle a ni," a ti.

Mahni inring tâwk mi chu an hlawhtling ṭhin tih sawiin, Larsap chuan, "MADC hruaitute leh kan upate hian kan ṭhalaite hi mahni inrintâwkna nei turin kan fuih fo tur a ni," a ti a; Saiha district-in kawng hrang hranga hlawhtlinna an chante a ngaihven reng dawn thu a sawi.

MADC hruaitute chuan Governor hi Sixth Schedule Amendment leh District Sainik Board din kawnga ṭanpui turin an ngen.

Lt.Gen. Sharma hi Lawng­tlaiah sorkar offi­cer-te nen an inkâwm a; Lawngtlai district chu Myanmar leh Bangladesh ramte'n an rî avangin ram dang mi dan loa lut rû an tam thei tih sawiin, Assam Rifle te, Border Security Force-te leh state police-te chu inpawh tlang taka venhimna hna thawkho ṭhin turin a chah.

Larsap chuan, Lawngtlai district officer-te chu ziak leh chhiar thiam an pun theih nan te, nau piang thi an tlem theih nan te, hriselna kawnga chak zawka hmalakna a awm theih nante inzirtirna tam zawk nei turin a chah a; kohhran leh tlawmngai pawlte nen nasa zawka thawkho turin a chah bawk.

LADC hruaitute chuan Governor hnenah hian an harsatna neihte an hrilh thlen a; Governor chuan, LADC hotute chu langtlang leh fiah ngama hna thawk ṭhin turin a fuih.

Larsap Lt.Gen. Nirbhay Sharma hi speaker Hiphei leh parliamentary secretary H Zothangliana ten an ṭawiawm a ni.