Olympic Day-ah Long Distance Run

Mizoram State Olympic Asso­ciation (MSOA) chu nimin khan senior vice president, Zodintluanga, Sports minister hoin a pisaah an ṭhukhawm a, June 23-a Olympic Day-ah intlansiak buatsaih an rel.

Kuminah chuan kum danga Olympic Day Run neih ṭhin dan ang ni loin, a duh apiang tel theihna tur intihsiakna Long Distance Run buatsaih an rel a; hmeichhia leh mipa inelna a hrana siamin pakhatna Rs 5,000, pahnihna Rs 3,000 leh pathumna Rs 2,000 pek ni se an ti a, 10-na thlengin lawmnman an dawng ang.

Zing dar 6:00-ah Bawngkawn aṭanga tlan ṭanin Lammual thleng intlansiak tur a ni a; Olympic Day hian Lammualah zing dar 6:30-ah inkhawm tawi buatsaih a ni ang.