CYMA nen thawh dun kan tum lo: CYCA

Central Young Chakma Asso­ciation chuan nimin khan thuchhuah an siam a; Central YMA-in Chakma foreigner dap chhuah a tumah CYMA nen thawh dunna tur resolution an siam loh thu an tarlang.

CYCA chuan, CYMA thu­chhuak June 8, 2015-a The Times of India-in a tihchhuah leh Vanglaini chanchinbu June 9, 2015-a chhuaka CYMA leh CYCA-te Bangladesh aṭanga Chakma foreigner dap chhuah kawngah an thawk dun dawn tih tarlan chungchangah nimin khan emergency meeting an nei tih an tarlang a, "CYCA-in CYMA nena Chakma foreigner dap chhuahnaa thawk dun turin resolution siam kan nei lo," a ti.

CYCA chuan, May 28, 2015-a Home department additional secretary Lalbiakzama leh CYMA hruaitute nena inkawmhonaah ram dang mi (foreigner)-te chu Chakmate chauh ni loin, hnam danga mite pawh an nih ve thu an sawi niin an tarlang a; chuvang chuan meeting chuan CYMA leh CYCA-te chu Bangladesh aṭanga ram dang mi dan loa Mizorama lut zawn chhuah kawngah sorkar nena thawkho tura tih a nih thu an sawi.

Mizorama NGO-te'n Mizorama Chakmate pun chak dan an sawi ṭhin leh Chakma zat an tarlan ṭhin chu sorkarin a chhinchhiah zat nen a inang lo niin CYCA chuan an sawi a; Mizoram puma mihring zat punna leh Chakma bik punna zat (rate) chu a inang tlangpui niin an sawi bawk.