KHAWTHLIR

Thisen pe
UPC kohhran hnuaia Apostolic Theological Institute chuan nimin khan Synod Hospital-ah thisen unit 23 an pe a, a petute mipa vek an ni. Hunthar Veng Branch YMA pawhin YMA Day pualin nimin khan Aizawl Civil Hospital-ah thisen unit 15 an pe a, a petute mipa 11 leh hmeichhia pali an ni.

Vaihlo hâl
Aizawl District Anti Tobacco Squad chuan meizial leh Gutkha chi hrang hrang dan kalha zawrh an man khawm, cheng nuai khat chuang man chu nimin khan State Refferal Hospital-a bawlhhlawh hâl ralna hmunah an chairman, Dr Franklin Laltinkhuma, Aizawl DC-in a hâl ral.

Sikserh zirho
National Vector Borne Diseases Control Programme hmalaknaa Mizorama medical officer-te sikserh zirtirna pe vek tura tih a nih angin nimin khan Lawngtlai district-a MO-te tan Lawngtlaiah training buatsaih a ni. Kumin January-April inkarah Lawngtlai district-ah mi 9,430-te thisen endikah mi 1,065-in sikserh an vei a; sikserh vei zinga 946 chuan Malaria PF an vei a ni.

Dincham lawm
Evangelical Church of Maraland leh Congregational Church of India Maraland-a Kristian Ṭhalai Pawlte chuan, nimin khan an din champha vawi 68-na an lawm.

Passport dil tan
Passport Seva Kendra, Aizawl chuan thuchhuah siamin, passport thar dil tum leh passport renew mamawhte tan website www.passportindia.gov.in ah dil theih a nih thu a tarlang a, "Passport dil duh chuan PSK/Aizawl ah pawisa deposit leh application form va lakchhuah kher a ngai tawh lo," a ti.

Kohhran ngen
Kolasib-a rualbanlote hamṭhatna tur leh enkawl dan tur ngaihtuahin nimin khan Kolasib DC Jitender Yadav hoin district thuneitute an ṭhukhawm a, rualbanlote lawi luh ve theihna tura biak-inte ruahman tura kohhran tin ngen an rel.