Hliappuia bawng vulhtute enfiah

NLUP Implementing Board (NIB) chairman JH Roṭhuama chuan, Thawh­ṭanni leh Thawh­lehni khan Hliappui khuaa NLUP bawng vulh­tute a tlawh a, an hna­thawh dan a enpui.

JH Roṭhuama chuan, NLUP bawng vulhtute zingah Hliappui khua chu a tiṭha ber an nih a rin thu sawiin, "Society-te siama nasa taka hma in la hi a lawmawm hle. In khuaa ram zau tak bawng tlatna hmun (grazing ground)-ah in siam a, duh tawka bawng ei tur, bawng chaw in hlui ṭhinte hi in entawntlak hle. Mizoram châwm thei tur bawngsa leh bawnghnute in la neih ngei ka beisei," a ti.

Hliappui khawtlang hruaitute chuan an khuaah AH&Vety department mi leh sa an awm loh thu leh bawng vulhah an hlawhtlin avangin Vety officer pakhat talin ṭhutchilh thei se an duh thu an sawi a; an bawng vulh hlawhtlin zual theih nana an mamawh hrang hrangte NIB Chairman hnenah an lo thlen a ni.

Hliappui khuaa NLUP dawngtute'n bawng vulh an thlang deuh vek a, mahse an khuain an mamawh dawna an hriat avangin NLUP dawngtu pathum chu industry trade thlantir an ni.