Zorama'n inkahhai a siampui : MNF

MNF party chuan thuchhuah siamin, Ma­ni­pur-a Zo hnahthlak helte leh sorkar laipui inkarah MNF president Zoramthanga’n inkah­haina tura inremna a siam­pui niin an tarlang.

MNF tarlan danin, June 9, 2015 chawhnu dar 3-ah New Delhi-a Jan­path Hotel-ah Mani­pur-a Zo hnahthlak hrang hrang - Hmar, Kuki, Paite leh hnam peng dangte intelkhawm United Peo­ple’s Front (UPF) leh sorkar laipui chu Suspen­sion of Operation (SoO) neih tumin an inbia a; chutah chuan MNF presi­dent Zoramthanga chu a bul tumtu a nihna leh sawm a nih angin a tel ve a ni.

UPF-ah hian pawl pariat - KNF, ZRO, KRA(U), ZDF, UKLF, KRF, ZDV leh HPC(D)-te an tel a; inbiaknaah chuan pawl hrang hrang aiawhte an tel a, UPF chairman ST Thangboi-a'n a ho. Sorkar laipui aiawhin Ministry of Home Affairs joint sec­retary (North East) Sham­bhu Singh hoin joint director (NE) leh officer dangte an tel.

MNF chuan, an president Zoramthanga'n India sorkar leh hel pawlte inkara remna a awm theih nana ṭan a la chu fakawm an tih thu sawiin, "Zo hnahthlak underground-te leh Central sorkar inkara rahbi thar tuksak lehtu Zoramthanga hi MNF chuan a chhuang a, a hnathawh hi ropui a ti tak zet a ni," an ti a; state pawna Zo hnah­thlakte leh Central sor­karin Zoramthanga chunga rinna an nghat chu lawmawm an tih thu an sawi bawk.