Zirlai hmeichhia phur luitu driver hmuh tumin mipui an pungkhawm

Thawhṭanni tlaia pawl 12 zirlai hmeichhe pakhat, Vaivakawna kal tur Rangvamual thlenga phur luitua puh, Ramnghinglova s/o Lallianzara, Ramhlun Venglai nia insawi chu Thawhṭanni tlai vek khan man a ni a; Vaivakawn Police Station-ah mipuiin hmuh tumin pung khawm mah se, buaina lian a chhuak zui lo.

Police aṭanga thu dawn danin, Thawhṭanni tlai dar 3:30 velah pawl 12 zirlai hmeichhe pakhat chuan Chanmari aṭangin Vaivakawna kal tumin taxi MZ-01 E-9996 a hmang a; taxi driver Ramnghinglova chuan hmeichhe zirlai chu Vaivakawnah chhuktir duh loin, Rangvamual thleng a phur lui a ni.

Hmeichhia hian Rangvamual aṭangin taxi dangin Vaivakawn a pan leh a, Vaivakawn PS-ah a hriattir nghal a; taxi number a chhinchhiah avangin police-te chuan Ramnghinglova chu an man a ni. Ramnghinglova hmel hmuh tumin mipui ṭhahnem tak chu Thawhṭanni zan khan Vaivakawn PS bulah an pungkhawm a, buaina lian tham awm loin zan dar 11 velan an ṭîn a ni.

Dampa Bial Ṭhalai Pawl chuan thuchhuah siamin, an bial chhung mi pawl 12 zirlai, Aizawla sikul kal Ramnghinglova'n mawi lo taka a ti chu an dem thu an tarlang a; Ramnghinglova chu dan anga na taka hrem ngei an phut thu an sawi.