Kum 2014-ah MACT-in case 126 chingfel

Motor Accident Claims Tribunal (MACT) chuan, kum 2014 chhung khan MACT thubuai 104 leh Workman's Compensation (WC) thubuai 22 an chingfel a; kum 2015-ah nimin thleng khan MACT thubuai 19 leh WC thubuai pasarih an chingfel bawk.

Vanglaini palai zawhna chhangin, MACT hotute chuan, Mizo­­rama MACT chu kum 1992-ah Law & Judi­cial department-ah hna thawk theiin din ṭan a ni a, kum 1997-ah Aizawl District Court building-ah office hran neiin hna an thawk ṭan tih an sawi.

MACT aṭanga thu dawn danin, kum 2014 chhung khan thubuai MACT-ah 70 leh WC-ah 15 an dawng a; case awm sate nen kum 2014 chhungin MACT thubuai 104 leh WC thubuai 22 a awm.

Kumin January 1 aṭanga nimin thleng khan MACT thubuai 38 leh WC thubuai 10 an dawng a; chutih laiin, MACT thubuai 19 leh WC thubuai pasarih an chingfel bawk.

A tlangpui thuin, MACT case hian lirthei chetsualnaa chuang ve mi dangte hliam leh thihna thlenga zangnadawmna phûtnate a huam a; WC case chuan lirthei neituin a chhawr, driver emaw lirtheia chetsualnaa hliam leh thite zangnadawmna phûtna a huam thung.

Nikum leh kumin chhunga MACT-a thubuai chinfel tawha MACT-in zangnadawmna pe tura thutlukna a siam zinga tam zawk chu cheng nuai hnih chuang a ni a; zangnadawmna sum chawi tura tih zinga an chawitir tam ber chu cheng nuai 30 chuang a ni a, nuai khat tling lo chawi tura tih tlem azawng an awm bawk.

Motor Accident Claims Tribunal-a presiding officer KL Liana chuan Vanglaini palai zawhna chhangin, lirthei chetsualnaa hliam leh thite zangnadawmna chu motor insurance tihna company-te chawi tur a nih thu a sawi a, "Motor chesualin insurance nung a neih loh erawh chuan motor neitu chawi tur a ni," a ti.

KL Liana chuan, Motor Accident Claims Tribunal chu mipuiin an la hre tâwk loa a lan thu sawiin, Mizorama lirthei chetsualna thlen tam dan ngaihtuahin, an hnena zualko nacháng hria an tam loh thu a sawi bawk.