Ayush doctor 100 chuang an duty mek

Mizoram AYUSH Doctors' Associa­tion (MADA) chuan thu­chhuah siamin, Covid-19 do chungchang­ah MADA member-te leh Mizoram sorkar chungah an lawm thu an tarlang. Mizorama Covid-19 facility hrang hrangah AYUSH doctor 100 chuang an duty mek a ni.

MADA chuan, Covid-19 chu hriselna lama thawktute tan pawh hri kai hlauhthawnawm tak a nih lai a, AYUSH doctor-te'n ṭhahnemngai taka sorkar thu âwiha hripui donaa hna an thawk chu lawmawm an tih thu leh an mem­ber-te inpekna leh an hnathawhte chu an chhuan theih thu an tar­lang a, "Mizoram sorkar pawhin AYUSH doctor-te thawh ṭhatzia leh ṭangkaina hmuh hmaih loh a, CCC leh DCHC-a duty tur AYUSH doctor 65 lai a lâk belh mek hi kan lawm tak meuh a ni," an ti.

MADA tarlan danin, Mizorama Covid-19 facility hrang hrangah AYUSH doctor 100 chuang an duty mek a; facility/centre hrang hranga an duty bakah, state leh district hrang hranga surveillance team, contact tracing team, logistic team, infection control team, etc.-ahte an tel. An member mi 40 chuang chu sorkarin a mamawh huna a koh mai theih turin an inpe tawh bawk.

Covid-19 dona atana sorkar laipui duan anga AYUSH Directorate-in Covid-19 prophylaxis damdawi - Arsenicum album 30 leh immunity booster - Chyavanprash-te mi 50,000 chuang hnena an sem thei chu lawmawm an tih thu an tarlang. 

No.    Covid-19 Facility    Duty zat

1.    Covid Care Centre    39

2.    Dedicated Covid Health Centre    3

3.    Quarantine facility monitoring team    37

4.    Sample collection team    11

5.    Screening point    5

6.    AYUSH Prophylaxis distribution    12