Ni 6 chhungin dan bawhchhia 151 man

Aizawl Traffic Police chuan lirthei kaihhnawih dan bawh­chhiatna vanga van­duaina thleng thei venna atan December 9, 2024 aṭang khan Aizawlah No Tole­rance Drive/Checking an kalpui a, December 14, Inrinni thleng khan lirthei dan bawh­chhia 151 an man tawh.

Traffic Police hotute hnen aṭanga Vanglaini thu dawn danin, Aizawl hmun hrang hranga No Tolerance Drive/Checking an kalpui hnua data an lak khawm tawh chin, December 9-14 chhung khan lirthei dan bawhchhia 151 man a ni a; chu'ngte chu driving license nei lo, insurance certificate nung lo leh Pollution Under Control Certificate (PUCC) nei lote an ni tlangpui.

Lirthei dan bawhchhia 151-te chu dan an bawhchhiat azirin pawisa chawitir an ni a; ni ruk chhunga lirthei dan bawhchhiate pawisa chawi tling khawm hi Rs 2,26,000 a ni.

Tarlan tawh angin, Traffic SP Stephen Lalrinawma chuan November 27, 2024 khan hriattirna chhuahin, December 9, 2024 aṭangin Aizawl­ah No Tolerance Drive/Checking kalpui a nih dawn thu a tarlang a; No Tolerance Drive chu lirthei kaihhnawih dan bawh­­chhiatna hrang hrang vanga vanduaina thleng thei ven­na atan a nih thu tarlangin, lirthei khalhtute chu dan zâwm a, fimkhur taka lirthei khalh tur leh lirthei document fel­fai tak nei turin a chah a ni.