Hâlpuah, etc. khap thlâwp turin Home Minister-in mipui a ngen

Home minister K Sapdanga chuan, sorkarin hâlpuah leh hâlmawi a khap tlat tih sawiin, sorkar hmalakna thlâwp ṭheuh turin mipui a ngen.

K Sapdanga hian nimina ZPM pisa khârna inkhawmah thu sawiin, "Kum 2013-a sorkar thar piang khan Krismas leh kum thar vuakveta hâlpuah hâlna hmun leh hun tur a siam avangin namenloin hâlpuah leh hâlmawi kan lo uar leh ta viau mai a, hei hian damlote tan harsatna nasa tak a siam a ni," a ti a, Mizoram boruak a tihchhiat thu leh air polution index a san phah nasat thu a sawi.

Sorkarin hâlpuah leh halmawi a khap tlat tih sawiin Home Minister chuan, "Kan unau Congress party pawhin he kan hmalakna min thlâwp thu an puang tawh a, kan lawm hle. Mipui pawhin sorkar hmalakna hi min thláwp ṭheuh turin kan ngen a ni," a ti.