Kum thum chhung India nen kan indo hnuah tlanchhiat a ngai - Zoramthanga

MNF party chuan nimin khan Mizo Hnam Rûnah Exodus Day an hmang a, MNF president Zoramthanga chuan, kum thum chhung India nen an indo hnuah tlanchhiat a ngaih thu leh harsatna tam tak karah India biak dan zawn a nih thu a sawi.

Zoramthanga chuan, "Kum thum chhung India nena indo hnuah tlanchhiat a ngai a, harsatna tam tak karah India biak dan zawn a ni. Mihring tumna leh remruatna zawng zawngte kha lo hlawhtling se, vawiina kan inremna ang hi a chhuak lo ang. Kan hlawhchhamnate kha Pathianin Zoram tun din a tumna zawk a ni," a ti.

Mizoram buai chu Pathian ruat a nih thu sawiin Zoramthanga chuan, "Pu Laldenga khan buai loa Shillong-a dawhkan kîla sawihopui a tum laiin, Assam Chief Minister khan inremna bawhchhiain sipai a rawn tír lui a, kan ram a buai ta a ni," a ti a; Pakistan president Ayub Khan remtihnain MNF-te chu Pakistan-ah an chhuk thu a sawi.

MNF President chuan, December 16, 1971-ah East Pakistan (tuna Bangladesh) khawpui Dhaka chu India-in a lak ní a nih thu leh East Pakistan a tlâwm avanga MNF Headquarters - Rangamati, tuipui zau tak hual vel kara awm aṭanga meilawng pasarih hmanga Pathianin mak tak maia a hruai chhuahna ní a nih thu a sawi a, "Thinglubùla dan chêpna aṭanga chhuah zalenna (Exodus Day) hi Pu Laldenga leh a hote remruatna ni loin, Pathian remruat a ni," a ti.

December 16 chu India sipaite tan hnehna ni ropui, an hmelma Pakistan tlàwmna ní 'Vijay Diwas' a nih rualin, MNF sipaite tan chuan India lak aṭanga chhanchhuahna ni ropui a nih thu Zoramthanga chuan a sawi a, "Harsatna su turin Pathianin MNF hi a tìr aṭangin a din a, a sut kiantir ṭhin," a ti a; MNF chu Pathianin kawng lakah a kalsan dawn loh thu a sawi.

Zoramthanga chuan, ZPM kaihhruai sorkarah sum lêng vâk a váng niin a sawi a; Mizoram sorkarin ni 100 inhlawhna a bat chu pe thuai tura a phût thu te, mipuiin Krismas leh kum thar hlim taka an hman theih nan sorkar hnathawk hlawh leh thil dangte pe thuai tura sorkar a phût thute a sawi bawk.

Exodus Day hman­naah hian martarte hriat reng nan minute khat chhung ngawi rengin an ding a; MNF treasurer Lalruatkima pawhin thu sawiin, VC/LC inthlan an hmachhawn turah an party inbuatsaihnate a sawi.

MNF hian an pisa chu kumin atan an khar nghal a, January 13, 2025-ah an hawng ṭan leh dawn a ni.