Sipai martarte zahna chibai bûk

Nimin December 16 kha India-in kum 1971 indonaa Pakistan a hneh champha a ni a, Vijay Diwas (Hnehna Ni) tia sawi a ni. Vijay Diwas pual hian nimin zing dar 8 khan Treasury Square-a War Memorial-ah sorkar hotute leh sipai hotute'n ram tana nun hlantute hriatrengna leh zahna lantir nan pangpar an dah.

Vijay Diwas puala War Memorial-a pangpar dahnaah hian Governor Dr Hari Babu Kambhampati-a'n hma hruaiin, sipai martarte zahna lantir nan pangpar dahin zahna chibai a bûk a; chief minister Lalduhoma, Home minister K Sapdanga leh sorkar leh sipai hotute leh sipai bângte'n zuiin pangpar an dah a ni.

December 16, 1971 khan Ramna Race Course tuna Suhrawardy Udyan ni ta, Dhaka khawpui, Bangladesh-ah India sipai hotu Lt.Gen. Jasgit Singh Aurora kaihhruai Allied Forces (India sipai leh Mukti Bahini) hmaah Pakistan sipai lalber (Chief of the Pakistan Forces) Lt.Gen. Amir Abdullah Khan Niazi leh a sipai 93,000-te chu an tlâwm a, India lakah an inpe a ni.

Indo-Pakistan War, 1971-ah hian India-in Pakistan a hnen avangin East Pakistan-in zalenna a hmu a, Bangladesh tih zui a ni.