RTI Online-a in register lo dept.-te in register vat turin MIC-in a hriattir

Mizoram Information Commission (MIC)-a chief information commissioner John Neihlaia leh information commissioner Manjagam Touthang chuan Mizoram RTI Online-a state public information officer (SPIO) la in register lo department 11-te nimin khan MIC pisaah an ko a, in register vat turin an hriattir.

MIC pisaah hian head of department leh senior officer eng emaw zat inlanin, RTI Online-ah an department SPIO la in register lote in register ngei a ṭul thu an hrilh. Department hotute chuan MIC thuchhuak chu a hma thei ang bera zawma hmalak an tum thu an sawi. Vawiin hian department 16 dang hotute MIC-a inlan leh tura hriattir an ni bawk.

Mizoram RTI Online hi July 1, 2022 khan hawn a ni. General Administration Department chuan July 22, 2022 khan hriattirna tichhuakin, departmental appellate authority (DAA), SPIO leh state assistant public information officer (SAPIO)-te chu Mizoram RTI Online portal-ah August 22, 2022 aia tlai loa in register turin a lo hriattir tawh a ni.

August 21, 2024 khan MIC chuan September 15, 2024 ral hmain register vek turin thuchhuah a siam a; la in register lo hriat chhuahte chu CIC hmaa an inlan tura koh a nih tur thu a chhuah angin hma an la zui ta a ni.