KHAWTHLIR

Ui khuahkhirh

Serchhip district magistrate Paul L Khuma chuan Bharatiya Nagarik Suraksha Sanhita, 2023 Section 163 tlawhchhanin Serchhip district-ah ui khuahkhirhna thupek a tichhuak a; thupek zâwm lote chu BNS, 2023 hmangin hrem theih an nih thu a puang. Ui khawlaia tlá leh a nghawnga hruia thlunna awm lote chu neitu awm lo anga ngaih a nih dawn thu tarlangin Magistrate chuan, "Ui vulhtute'n an an ui vulhte ṭha takin an khuahkhirh tur a ni," a ti a; ui zun leh êk khawlaiah an hnutchhiah phal a nih loh thu a tarlang bawk.

Mi 236 pawm

Champhai District Town Vending Committee chu an chairman VL Remliana, bawrhsap kaihhruaiin nimin khan an ṭhukhawm a; Champhai Vengthlang VC-in Awmpui Pheia Krismas bazara inpho dilna an dawn aṭanga an pawh chhuah mi 236-te an pawm. Krismas leh kum thar vuakveta mipui bazarte an him zawk nan bazar turte chu CHANEM tualah lirthei dah vek turin an hriattir bawk.

Sihphir-Kawnpui kawng khâr dawn

Sihphir-Kawnpui inkar kawng chu siam a nih dawn avangin December 18-21, 2024 chhungin chawhma dar 10 aṭanga chawhnu dar 1 inkarah khâr a nih dawn thu Aizawl SP Rex Zarzoliana chuan a tarlang. Aizawl SP tarlan danin, December 23, 2024 aṭangin hna thawh zawh hma zawng LMV chin hnuai lamte chhun dar 12:00 - 1:00 inkarah tlan theih a ni ang a, MMV-te chu tlai dar 4 leh zing dar 9 inkarah chauh tlan phal a ni a, HMV chu Sairang lamah tlân tur a ni.

Hnathawh thlir lêt

Khawzawl District Consultative Committee, District Level Review Committee leh District Level Security Committee chu an chairman K Vanlalṭhiana kaihhruaiin nimin khan an ṭhukhawm a; Khawzawl district tana NABARD buatsaih Potential Linked Credit Plan 2025-26 chu Bawrhsapin a tlangzarh. Bawrhsap K Vanlalṭhiana chuan, mipuite'n awlsam zawka loan an lak theihna tur leh hamṭhatna an neih angte an hriat theih nan financial literally campaign chak taka kalpui a ṭul thu a sawi. Ṭhutkhawmah hian kum 2024 chhunga Khawzawl district-a bank hrang hrangte hnathawh dan thlirho a ni.