CM-in CM's Rubber Missions a hawng

Chief minister Lalduhoma chuan nimin khan Dawrpui Multipurpose Hall-ah Mizorama ṭhelrêt (rubber) chìn theihna hmun zawng zawnga chìn vekna tur, 'Chief Minister's Rubber Missions' a hawng. CM chuan, "Thlai tam tak kan chíng thlawn tawh ṭhin a, rubber hi chu kan chíng thlawn lo ang," a ti.

Chief Minister's Rubber Missions bul ṭanna atan hian NABARD Regional Office general manager Pankaja Borah chuan RIDF XXX aṭanga cheng vbc 27.98 sanction-na lehkha chu CM Lalduhoma hnenah a hlan. He sum hmang hian district pasariha zau 24-ah bul ṭan tum a ni.

Lalduhoma chuan, tun hma aṭangin sorkarin kut hnathawktute tan thlai chìn tur hrang hrang a kalpui tawh thu a sawi a, "Nimahsela, kan thlai kawhhmuh kha a lo fuh tâwk lo fo a, an beidawng ṭhin. Hmalakna tam tak kan lo kalpui tawh ṭhin na á, tunah hian kan ram hi han en ila, hmun zau tak tak hi a la âwl duai mai a ni. Kan ram ruak, rubber chìn theihna hmunahte hian khuarei daih, a hralhna lama harsatna awm ve ngai lo rubber hi ching vek mai ila, kan la ṭhatpui tur a ni," a ti a; ṭhelrêt chu an chìn thlawn loh tur thu a sawi.

Mizorama kut hnathawktu tui tak tak ho hi kum upa tawh lamte leh pensioner-te an ni fur tih sawiin Lalduhoma chuan, "Kan ṭhalaite'n kut hnathawh hi rawn tui se, thapui thawhin rawn bei se kan duh a ni," a ti.

Land Resources, Soil & Water Conservation minister Lalthansanga pawhin thu sawiin, "He Mission hi CM Pu Lalduhoma leh Rubber Board of India chairman Dr Sawar Dhanania te ngaihtuah chhuah a ni a, Mizoramin bung thar kan kaina tur hmalakna a ni," a ti a; LRSWC department pawh an inbuatsaih nasat thu leh an phûr thu a sawi.

Inkhawma tarlan danin, Mizoram hian ṭhelrêt chìn theihna ram hectare 37,000 aia zau a nei a, hectare 6,700 velah chìn tawh niin, chìn tawh hmun thuma ṭhena hmun khat vel a hnaì theih tawh. Kum tin ṭhelrêt chíngtute'n metric ton 1,460 vel an thar mek a ni.

CM's Rubber Missions hawnna inkhawm hi LRSWC director Vanlalmuanpuia Chhangte-in a kaihruai a; Assembly deputy speaker Lalfamkima, Horticulture minister Prof. Lalnilawma, adviser to CM TBC Lalvenchhunga, Planning Board vice chairman Dr Kenneth Chawngliana leh official dangte an tel.

CHIEF MINISTER'S RUBBER MISSION

• Mission hian thuneitu sang ber, Governing Board a nei dawn a, a hnuaiah Steering Committee a awm ang.

• Steering Committee kaihhruaina hnuaiah nodal department - LRSWC-in district tina DC-te nen thawkhoin hna an thawk ang.

• Steering Committee kaihhruaiten NEC, NABARD, EAP, Ministry of Minority Affairs, CSR-te leh a remchang apiangah sum an dap ang.

• Kum tin ram hectare 1,000 zel target siam a ni a, chhungkaw 1,000 zel tuam a ni ang.

• Kum 2025-26 financial year-ah bul ṭanin, kum 4 chhung atan kalpui phawt a ni ang.

• Hmalakna hi zau (cluster) ang zela kalpui tur a ni.