Ni 2 chhungin Covid-19 vei mi 61 MLA BD Chakma’n hripui a kai Inthlan kaihhnawih positive an pung

September 11-12, 2020 chhung khan Mizoramah Covid-19 vei mi 61 hmuh chhuah a ni. Hripui vei September 12, Inrinnia hmuh chhuah zingah MLA Dr Buddha Dhan Chakma a tel a; local council inthlana official duty mi pali leh inthlan buaipuitu dang mi 10 chuang an tel bawk.

September 11, Zirtawpni khan Covid-19 vei mi 26 hmuh chhuah a ni a, mipa 25 leh hmeichhia pathum niin, nausen thla 9 mi pakhat a tel a, symptom nei an awm lo. Mi 26 zinga mi 18 chu Veng­hnuai, Aizawl mi vek niin, local positive contact vek an ni a, mi dang pariat chu state páwn lam mi vek an ni.

ZMC-a hmuh chhuah, Venghnuai mite hi mipa 15 leh hmeichhia niin, nausen thla 9 mi pakhat tih loh chu puitling vek an ni. Venghnuai aṭanga thu dawn danin, an zinga mi 14 chu local council inthlana che vêl an ni a, LTF member-te an tam ber a, election official duty pakhat a tel niin an sawi. Mi dang pali chu a hmaa kái hmuh tawh laina hnaite an ni hlawm. 

Venghnuai aṭanga thu dawnna chuan, Dongdong Catering-in LC inthlan ní-ah inthlana duty-te chaw an buatsaihsak a, chaw ei zingah MPF aṭanga duty leh vote chhiartute'n hripui an kai loh laiin, LTF member-te'n an kái hlawm tih a sawi a; a hmaa inneihnaa ruai chaw an pekte an fihlim vek tih a sawi bawk.

Inrinnia Covid-19 vei hmuh chhuahte hi ZMC-a hmuh chhuah mi 28, Rapid Antigen Test hmanga hmuh chhuah pahnih leh, district hrang hranga TrueNAT laboratory-a hmuh mi panga an ni a, an zingah naupang kum 2 leh 7 mi an tel.

ZMC laboratory-a hmuh tharte chu Aizawl district-a mi vek, mipa 23 leh hmeichhia paruk, kum 7 - 75 inkar an ni a, an zinga mi 12 chu Mizoram chhunga kai (local positive contact) an nih laiin, mi 16 chu state páwn aṭanga rawn lut thar an ni.

September 12-a hmuh chhuah, local positive contact aṭanga kai mi 12 zingah MLA Dr BD Chakma, Tuichawng bialtu a tel a, a taksaah harsatna (Covid-19 symptom) a nei lo a, nimin tlai khan SRH-ZMC-ah lâk phei a ni. 

Tuikhuahtlang Local Task Force hruaitute hnen aṭanga thu dawn danin, an veng huam chhunga minister bangla-a cheng mi pakhat leh MLA Hostel (Legislator's Home)-a cheng midang pakhatin hripui hi an kai.  

Republic Vengah Covid-19 vei mi pathum hmuh chhuah thar a ni a, an zinga mipa pakhat chu LC inthlana official duty niin, August 27-ah Zotlangah leh September 4-ah Durtlang North-ah a duty a ni. Mipa pakhat chu a kaina âwm rin theih a awm nual a; hmeichhe pakhat chu hripui veiin a tlawh Mission Venga dawr aṭanga kai a nih rin a ni.

Upper Republic LTF vice chairman R Lalhrilliana'n Vanglaini a hrilh danin, an venga Covid-19 vei hmuh thar mipa pahnih chu Republic Vengthlang LC inthlana vote chhiartute an ni a; hmeichhia pakhat chu a fanu Covid-19 vei aṭanga kai a nih an ring. Hmeichhia pakhat zawk erawh chu a kaina àwm an hriat loh rualin, a pasal chu LC inthlana vote chhiartu zinga mi a ni a, "A pasal hi chu a negative thung," a ti.

September 12-a hmuh chhuah zinga mi, Khatlaa hmeichhia kum 21 mi, Covid-19 vei hmuh thar chu Assembly Secretariat-a despatch rider (hripui vei) chhuina kal zela a swab sample endik a nih thu, Khatla LTF Secretary chuan a sawi. Chanmari venga mipa kum 23 chu Sunflower Electronic nghaktute zinga mi a ni a, he dawr hi Covid-19 positive pahnihin an tlawh tih, Chanmari LTF hruaitute chuan an sawi.

Hetih lai hian, September 9-a hripui vek hmuh chhuah, LC election inthlana duty eng emaw zat chhungte chu ZMC-ah endik an ni tawh a, an result a ṭha deuh vek nia thu dawn a ni.

ZMC-a hmuh chhuah dang mi 16 zingah - quarantine facility, SAI, Mission Vengthlanga khung hran mek mipa 12 leh hmeichhia pahnih, kum 7-59 inkar an tel a, an zinga paruk chu SGI hnuaia thawk state dang mi niin, mi dang pariat chu Mizorama awm an ni. YHAI quarantine facility, Luangmuala awm lai, Assam aṭanga rawn lut mipa pahnihin hripui an vei bawk.

Lunglei Civil Hospital laboratory-ah mi pali, mipa leh hmeichhia pahnih ve ve, kum 27-30 inkar hmuh chhuah a ni a; Telangana, Pune, Jammu & Kashmir leh Uttar Pradesh aṭanga lo lut, quarantine centre-a awm lai an ni. An zinga pathumin Covid-19 symptom an nei.

Kolasib District Hospital-a TrueNAT laboratory-ah Covid-19 vei mipa pakhat hmuh chhuah a ni a, Tinsukia, Assam aṭanga lo haw khung hran mek a ni. Vairengte checkgate-ah hnam dang driver/handyman pahnih hmuh chhuah a ni bawk.

District hrang hrangah TrueNAT laboratory bun thar a ni a; TrueNAT laboratory aṭanga September 11-a hripui vei hmuh chhuah dan chu - Siahaah Assam mi mipa pakhat, Lawngtlaiah state pawn lam mi mipa pahnih leh, Saitualah mipa panga, state páwn mi vekte an ni.

1.    Tuikhuahtlang    3    MLA Hostel-a cheng pahnih leh minister bangla-a 

            cheng pakhat

2.    Republic Veng    3    Mipa 1 chu LC election official duty (hmun 2-ah);

            Mipa 1 chu kai theihna âwm a awm nual;

            Hmeichhia 1 chu Health Food, Mission Veng kaihhnawih

3.    Upper Republic    4    Mipa 2 LC election duty; hmeichhia 1 a fanu aṭangin;

            Hmeichhia 1 kaina hriat chian loh

4.    Khatla    1    Hmeichhia 1 - Assembly despatch rider contact kal zel

5.    Chanmari    1    Mipa - Sunflower Electronic dawr nghâktu

(September 11-a hmuh chhuah)

1.    Venghnuai    18    LC election official duty 1;

            LC inthlana che vel LTF duty mi 14;

            Positive tawh laina hnaite 4