Champhai daia Keilungliah tuikhuah Sea plane ṭum theih nan siam tum a ni

Champhaia Keilungliah tuikhuah chu sea plane ṭum theihna atan siam tum a ni a, chumi atana hmalakna kal zelah nimin khan bialtu MLA H Ginzalala, adviser to CM, GAD (Aviation Wing) deputy controller Saidenga, PHE executive engineer Dengṭhuama leh Maritime Energy Heli Air Service Pvt.Ltd (MEHAIR), Port Blair aṭanga lo kalte'n a hmunah an enfiah.

H Ginzalala chuan, Mizoram hmun hrang hrang an zir chian tawhah Keilungliah tuikhuah chu khawpui kiang hnaivai, mipui leh khualzin tana awlsam leh kalpawhna hautak si loa amphibious aircraft dahna tur remchang awmchhun a nih thu a sawi a, "Serlui, Tuirial leh khuarel dilte hrang hrangte pawh ṭha leh remchang awm mah se, a panna leh veivahna thui lutuk leh a chhawrtute tan a senso a hautak lutuk avangin a remchang tâwk lo," a ti.

A bial Champhai North-ah sea plane dahna tur hmunhma an neih chu bawhpelh a hlau tih sawiin Ginzalala chuan, "Sea plane neitu company hotute chahin, Aviation Wing hotute leh he lamah mithiamte nen vawiin hian hmalakna hmasa ber nei turin kan lo kal a ni," a ti a, theihtawp a chhuah zel dawn thu a sawi.

Keilungliah tuikhuaha amphibious aircraft ṭum leh thlâwk chhuak thei tur hian metre 50-a zau leh metre 750 - 1,000 inkara thui a ngai a; tuikhuah ngil thei tura vaukam ram laih ngil te, basemen art work hnathawh tur tam tak a ngai dawn. Project atan hian Swadesh Dhaksan nen ṭanghoin cheng vbc. 20 vela hmalaka tihpuitlin theih beisei a ni.

Amphibious aircraft hi tuipui leh khaw­muala ṭum kawp thei a ni a, ruahman hma­saah chuan mi pakua chuan theihna niin, hun lo kal zel turah mi 18-19 chuan theihna tura hmalak zel tum a ni. Technical visibility study nei turin Aviation hotute leh sea plane hotute'n January 2025-ah survey ṭan theih an inbeisei a ni.