Inhlawhna hlawh pek loh chhan sawifiah; Central lama khâwl chian loh vang - RD dept.

Rural Development (RD) department chuan ni 100 inhlawhna (MGNREGS) hnuaia inhlawhte hlawh thla hnih chhung pek loh chhan an sawifiah a; sorkar laipuia pawisa pe chhuaktute'n khâwlah harsatna an neih vang a nih thu an tarlang.

RD department chuan, MGNREGS hnuaia inhlawhna chu thla hnih pek a ni tawh lo tih tarlangin, "Mipuite'n harsatna an tawh avangin sorkar chuan pawi a ti tak zet a, an harsatna sukiang turin theihtawp chhuah mek a ni a, mipuite lo dawh hram hram turin kan inngen a, Krismas hmaa mipuite bank account-a a luh vek hman beisei a ni... Central lam nen inbiakpawh reng a ni a, rei lo têah siam zawh an inbeisei," an ti.