Thlai pho rona khâwl thar inhlân

Gandhi Institute of Technology and Management (GITAM) University, Visakhapatnam chuan nimin khan Horticulture minister Prof. Lalnilawma hnenah nizung chakna hmanga thlai pho rona tur ‘Hybrid Solar Dryer with Automated Temperature Controller Technology’ an hlan.

GITAM University aiawhte chuan, Hybrid Solar Dryer with Automated Temperature Controller Technology chu kut hnathawktute tihhmasawnna tura hmalakna a nih thu leh Mizoramin hmasawnna kawng chak lehzuala a zawh theih nan a thlawnin an pek thu an sawi.

Hybrid Solar Dryer with Automated Temperature Controller Technology hi Technology Enabling Centre-a thiamna thar 22 an duan chhuah zinga pakhat a nih thu te, nizung chakna hmanga chak zawka thlai thar pho ro theihna a nih thu te, 89 degree celsius thlenga saa dah theih a nih thu te, thlai pho rona (solar dryer unit) ft. 6 bial pathum chu Rs 60,000 velin khâwr pum theih beisei a nih thute an sawi bawk.

Prof. Lalnilawma chuan, Mizorama kut hnathawktute thlai thar sawngbawlnaah pho/rêp ro nan hun, sum leh thâ tam tak sèn a nih ṭhin thu a sawi a, "Hybrid Solar Dyer Technology hmang hian heng harsatnate hi sutkian theih a nih ka ring a, Horticulture department hnuaia chak lehzuala Mission for Integrated Development of Horticulture kalpuina tur hmanraw ṭangkai a nih ngei ka beisei," a ti.

Kut hnathawktute tihhmasawn duhna vanga GITAM University leh Technology Enabling Centre, Mizoram University inpekna lawmawm a tih thu sawiin Minister chuan, Mizoramin hmasawnna kawng a zawh zel theih nan thawhho zel a duh thu a sawi bawk.

Hmanrua inpeknaah hian Horticulture Minister leh GITAM School of Business dean Prof. Raja Phani Pappu ten ‘Letter for Technology Transfer Understanding’-ah hming an ziak a ni.