Aizawlah Winter Festival ṭan a ni

Nimin chawhnu khan Lammualah Tourism department buatsaih Winter Festival 2024 ṭan a ni a, Tourism minister Lalrinpuii'n a hawng.

Tourism Minister chuan, Winter Festival kaihhnawiha sorkar department hrang hrangte thawhhona fakawm a tih thu a sawi a, "Department-te mai bakah khawtlang, mimal leh pawl hrang hrangte tan pawha hlâwkna thlen thei tur tinzawna sorkar hmalakna hi a chhunzawm tlak hlein ka hria," a ti.

Sorkarin mipui zirtirna lam hawi a kalpui uar zel tih sawiin Lalrinpuii chuan, "Hemi nena inhmeh tak Winter Festival buatsaih a ni hi a remchang hle," a ti a; Mizoram chu India ram state dangte nena khaikhin pawhin tourism sector-a theihna leh remchanna ngah ber pawl a nih thu a sawi.

Winter Festival hawnna hun hi Tourism secretary Dr Lalrozama'n a kaihruai a, WInter Festival buatsaih a nih dan a sawifiah.

Winter Festival 2024 hian December 21, 2024 thleng a awh dawn a, intihhlimna chi hrang hrang leh ei leh in turte a awm ang. Zan lamah concert buatsaih ṭhin a ni dawn a, luh man awm loin a duh apiangin chhim theih a ni a; a tàwp zan, December 21 zanah Secondhand Serenade-in hun an hmang dawn a, hetah hi chuan luh man a awm ang.

Winter Festival pualin December 17-ah Hmuifang tlangah Kite Festival buatsaih a ni dawn a, zan lamah Leikapui Zan hman a ni ang. December 19-ah Reiekah Arkaiden Zan hman a ni dawn bawk.