MYC kaltlangin mi 43-in hna an hmu

Governor Dr Hari Babu Kambhampati chuan nimin khan Raj Bhavan-ah Mizoram Youth Commission (MYC) chairman Malsawmzuala Ralte a kâwm a, MYC hmalaknate leh hmachhawpte a sawipui. MYC Chairman chuan, kumin 2024-25 kal mekah MYC kaltlangin mi 43-in hna an hmuh thu a sawi.

Dr Hari Babu Kambhampati chuan, India ram hmun hrang hranga hna thawh tur remchang tam tak awmte Mizo ṭhalaite'n an hmuh theih nana chak zawka hmalak a ṭul thu a sawi a, "Zirna sang zawk bêl lo, thingtlang kilkhawr zawka awmte thlengin an kumin a phâk chuan hna an hmuh theih nan puih a ṭul. An thiamna leh an tuina azir zela ṭhalai hna zawngte register-a data mumal tak neih hmasak a pawimawh a, hna a awm veleha an zawm theih nana lo inhmakhua lâwk a ṭul," a ti.

Mizo ṭhalaite chu mahni awm hmun chhuahsan hreh lo tur leh hmun danga hna zawnga chhuah tum turin Larsap chuan a chah a; MYC hotute chu Mizo ṭhalaite'n hna tam zawk an hmuh theih nan theihtawp chhuah tura chahin, a ṭul huna pui turin a inhuam reng thu a sawi.

MYC chairman Malsawmzuala Ralte chuan, sorkar kum kal mek 2024-2025 chhunga an hmalaknate Governor a hrilh a, mi 43-te'n MYC kaltlanga hna an hmuh thu a sawi a ni.

Malsawmzuala Ralte chuan, Mizo ṭhalaite hmakhua ngaia Govenor-in state danga hna thawh tur a ngaihtuahsak ṭhin leh tun hnaiah Governor hmalaknaa Sri City, Andra Pradesh-ah Mizo ṭhalai pariatin hna thar an hmu chu lawmawm a tih thu a sawi bawk.

MYC Chairman hi MYC secretary V Lalmuanpuii'n a ṭawiawm a ni.