Kan huna hnathawh leh thawh tur chin hi chu a ṭha tur a ni - CM

Chief minister Lalduhoma kaihhruaiin nimin khan CMO conference hall-ah Mizoram State Project Monitoring Committee (MSPMC) General Body Meeting vawi 4-na neih a ni. CM chuan, ZPM sorkar hnua hnathawhte chu a ṭha tur a ni tih sawiin, ram hmasawnna ṭha leh tlo siam ngei an tum thu a sawi.

CM Lalduhoma chuan, MSPMC member-te thawhrimna fakawm a tih thu sawiin, report kimchang tak siam zel turin a chah a, "Project lo thawh mek tawh, siamṭhat hleih theih tawh lohte hi chu thui tak kan siamṭha thei lo a nih pawhin, kan huna hna thawhte leh thawh tur chinte hi chu a ṭha tur a ni," tiin, hmasawnna hnathawhte ṭha taka endik an tum thu a sawi.

Ṭhutkhawmah hian September - November, 2024 chhunga MSPMC-in hmasawnna hnathawh an endikte a lem nen thlirho a ni a, hmalak zui zel dan tur sawiho a ni.

September-November chhunga MSPMC-in an endikte chu - Mac Donald Hill-a High Field Multipurpose Ground siam, Aizawl Tlangnuama Eklavya Model Residential School sak, PMMSY hnuaia Thenzawla Brood Bank siam leh, Durtlang Leitan - Sihphir inkar kawng zauh leh siamte a ni.

Tlawng Sihhmui kaia lei dawh mek an vil chungchang MSPMC hotute tarlan danin, Tlawng lei (bridge) thar dawh tur nawr kai tumnaa a khai chhinna hrui chah chhan chu pulley vir thei lo (pulley jam) vanga hrui inbât chat a ni. Hna thawktute chuan fimkhur lehzuala hna an chhunzawm leh tur thu te, an hmanruate an lak khawm leh phawt dawn thu leh, January 2025 hapta hnihnaah an thawh chhunzawm theih an inbeisei thu an sawi.

Sorkarin hmasawnna hna a thawhna tur hmun ram pass neih hmasak a ṭul thu te, hna thawh zawh a nih hnua a enkawlna lam kalpui dan kaihhruaina ṭha neih a ṭul thute ṭhutkhawmah hian sawi a ni. Works department ni lo department dangte'n civil construction work lian an khawihna hmuna harsatna awm chungchang te, contractor hun pawhseisak chungchang leh MSPMC hmalakna a chak zawk theihna tura rawtnate sawiho a ni bawk.