HIV/AIDS Training Manual tlangzarh

YWCA of Aizawl, UNAIDS, MSACS, CDC leh kohhran hrang hrang aiawh telna Steering Committee-in HIV/AIDS chungchang inzirtirna tura an buatsaih 'Training Manual on HIV/AIDS' tih lehkhabu leh training kalpui tur chu nimin khan Royale Lalawi Hotel-ah MSACS project director Dr Lalthlengliani’n a tlangzarh.

Tlangzarhna inkhawm hi Young Women Christian Association (YWCA), Aizawl president Lalhmingliani Hmar-in a kaihruai a; kohhran hrang hrang aiawhte leh positive network hrang hrang aiawhte an tel.

Steering Committee member Lalhmunsiama Pautu-in Training Manual siam tura hmalak dante a sawi a; YWCA of Aizawl project coordinator Lalrinngheti'n Training Manual hman ṭangkai dan turte leh hmalak zel dan turte a sawi bawk.

Training Manual on HIV/AIDS-ah hian YWCA of Aizawl team bakah, Synod Theological Education Board member Rev.Dr Vanlalruata, BCM executive secretary (Lawngtlai area) Rev. H Lalthlamuana leh Synod Hospital-a mi Dr Lalchhanhima Ralte ten inzirtirna tur thu an ziak a ni.

Training Manual hi kohhran hrang hranga HIV/AIDS chungchang inzirtirna tur a ni a; HIV/AIDS chungchang, HIV laka inven dan tur, HIV veite chunga hmangaihna leh khawngaihna lantir dan turte kum bithliah mila zir turin ziah a ni. HIV/AIDS chungchanga sermon inkaihhruaina a tel bawk.